RMN Laoag — “Nagdomino effect” ti disgrasia a napasamak iti abagatan a paset ti Gilbert Bridge iti siudad ti Laoag nu sadino a dinarusdos ti maysa a Bus ti lima a lugan.
Basar iti impormasyon, naawanan ti kontrol ti manibela ti driver ti bus bayat nga agtartaray daytoy iti nasao a rangtay ket idin ta nakamenor dagiti adda iti sangoan ti bus saan metten a naikamat ti preno rason a nadungpar ti umuna a lugan aginggana a naidungpar pay ti tallo a lugan a makinsangsango.
Dagus met a nagresponde dagiti pannakabagi ti Philippine National Police nangnangruna ti traffic division ken Department of Public Safety (DPS). Awan ti nadangran, malaksid kadagiti luglugan a nakupkuppit.
Nakiareglo met ni Jessie Ducol Apostol, 65 operator ti Bus ken Frederick Lachica Domingo, Driver, taga Barangay Paltit, Badoc ken Palongpong Batac City, Ilocos Norte kadagiti nadungpar a luglugan iti abagatan a paset ti Gilbert Bridge.
Nagkari a bayadanda ni Marc Sinang Quatchon iti 192 thousand pesos; Lemuel Santos Agcaoili – 83 thousand pesos; Jan Jayson Flojo – 53 thousand pesos ken Ralph Emerson Daguimol Dacanay – 25 thousand pesos.
Ti Gilbert Bridge ket maysa kadagiti lugar a kaaduan a pakapaspasamakan ti disgrasia numan pay adda iti speed limit na ti rangtay nga agpatingga iti 50 kilometers per hour, saan a masursurot daytoy ken awan mangsipsipot kasta pay nga mangtiliw kadagitoy.
Bernard Ver, RMN News
