Ginsulod sang mga kawatan ang lima tanan ka balay sa Brgy. Pandan , Dueñas, Iloilo kaina sang kaagahon, Hunyo 5.
Ang lima ka balay ang ginapanag-iyahan nanday Erla Gonzales , Perla Onso , Nestor Espinosa , Nerrisa Espinosa kag Jake Celis .
Suno kay Police Master Sergeant Sherwin Selda sang Duenas PNP, ginabanta nga indi magnubo sa 6 ka kawatan ang nagsulod sa mga balay kag ginapatihan mga katapo sang organisado nga grupo.
Ginpahayag ni Selda nga nag-agi ang mga kawatan sa bintana pinaagi sa pagkakas sang mga jalousie.
Ginabanta nga naglab-ot sa 30 mil pesos nga balor sang pagkabutang kag kwarta ang nakuha sang mga kawatan .
Nabilin naman sa lugar nag isa ka pink nga kalo sang babaye kag kutsilyo nga ginapatihan iya sang mga kawatan.
Padayon ang imbestigasyon sang kapulisan agud madakpan ang mga suspek.
Nagapanugyan si Selda sa publiko nga mag-aligmat ilabi na nga maulanon ang panahon kag indi malikawan nga mangin mahamuok ang tulog bangud nagabantay man agud magpangbiktima ang mga kawatan.
(photo from web/ not the actual photo)
