Lima ka gituohang membro sa NPA, patay sa engkwentro sa Tagoloan 2, Lanao del Sur

35

Patay ang lima ka gituohang membro sa New People’s Army, dihang na-engkwentro kini sa mga sakop sa 1st Special Forces Battalion, pasado alas-9:00 kagahapon sa buntag, sa may bisinidad sa Barangay Gayakay, lungsod sa Tagoloan 2, Lanao del Sur.

Duol ang lugar sa may daluna sa Talakag, Bukidnon.


Matud pa ni Maj. Rodulfo Cordero, Public Affairs Officer sa 4th Infantry Division, nagpahigayon og security operation ang tropa sa 1st SF Battalion dihang na-engkwentro ang kapin kun kulang 30 ka mga armado kinsa nasayrang mga sakop sa Sub-Regional Command o SRC 4 ug SRC 5 ilawom sa North Central Mindanao Regional Committee (NCMRC).

Milungtad sa usa ka oras ang sinukli-ay og bala ug na-usban pa pagka-alas 11:00 sa buntag sa susamang adlaw.

Na-recover ang mga lawas sa mismong encounter site ug nakuha ang unom ka mga high-powered firearms nga gilangkuban sa M16 rifles, duha ka mga garand rifles ug usa ka M14 rifle.

Gikumpirma ni LtC. Vercisio San Jose, Jr., commander sa 1st SF Battalion, walay samaran o namatay sa puwersa sa gobyerno. 




Gisuta pa ang pagkatawo sa mga namatay pinaagi sa tabang sa mga kanhi kaubang rebelde nga naa na karon sa sabakan sa gobyerno.

Facebook Comments