Lima ka mga medical doctors kag isa ka nurse sa Bacolod, una nga nakabaton sang covid-19 vaccine

Nakabaton na sang Covid-19 vaccine ang lima ka mga medical doctors kag isa ka nurse sa ginpatigayon nga ceremonial vaccination kahapon sang aga sa Bacolod City Government Center.

Natublukan sang una nga dose sang Sinovac vaccine nga CoronaVac sanday Dr. Miguel Sarabia, isa ka opthalmologist kag presidente sang Negros Occidental Medical Society; Dr. Hector Gayares Jr., CEO sang Adventist International Heathcare System Philippines, deputy medical volunteer sa Emergency Operations Center; Dr. Dolores Rommela Tiples-Ruiz, isa ka infectious disease specialist kag presidente sang Philippine Society for Microbiology and Infectious Diseases – Negros Occidental Chapter.

Lakip man sa nakabaton sang bakuna sanday Dr. Radela Yvonne Ramos-Cortes, isa ka allergologist; Dr. Carlos Javier Primicias Jr., isa ka pediatrician kag Valeries Villarosa Sarabia, isa ka nurse kag asawa ni Dr. Miguel Sarabia.


Ini sila ang una nga mga persona nga nakabaton sang bakuna sa bilog nga Western Visayas.

Pasado las 9 sang aga sang nagabot ang 6,270 doses sang CoronaVac vaccine sa Bacolod-Silay Airport nga igahatag sa mga healthcare workers sa Corazon Locsin Montelibano Memorial Regional Hospital kag Riverside Medical Center.

Gintalana sa Domingo, Marso 7 ang pag-umpisa sang inoculation sa mga frontliners sa nasambit nga mga ospital.

Nagtambong man sa nasambit nga ceremonial vaccination si Bacolod City Mayor Evelio Leonardia nga damlag pa nagpabutyag sang iya kahandaan nga magpatublok sang bakuna.

Ang nasambit nga mga bakuna ang kabahin sang 600,000 doses sang Sinovac vaccine nga nagabut sa pungsod nakaligad nga Pebrero 28 nga gindonar sang pungsod China.

[image: image.png]

Facebook Comments