Davao City – Giabisuhan sa City Traffic and Transport Management Office o CTTMO ang mga parokyano o manimba karong Dominggo atol sa pagobserba sa Palm Sunday o bindita sa lukay nga makigkoordinar sa mga schedule sa lima ka mga simbahang maapektuhan atol sa lumba sa Alveo Ironman 70.3 Davao.
Tungod sa ipatumang full road closure sugod alas 3 sa kadlawon sa mga ruta nga agian sa mga triathletes apektado ang St. Joseph Parish sa Sasa, St. Francis Xavier Parish sa Tibungco, St. James sa Bunawan Sta. Catalina sa Lasang ug Redemptorist Church samtang ang Carmelite dili tantong apektado kay abli ang Southbound para sa 2 way traffic.
Gipahimangnuan ni CTTMO chief Dionisio Abude ang publiko nga sa buot manimba mamahimong magsayo o sutaon sugod karon pa lang kung adunay pagsibog sa oras sa service sa mga nasangpit nga mga simbahan.
Dugang ni Abude nga pipila ka mga simbahan sa Panabo, Carmen ug Tagum nga apektado aduna nay gipatumang mga adjustments sa ilang mga skedyul.
Giklaro ni Abude pweding makatambong gihapon sa mga aktibidad sa mga simbahan ang mga katawhan pero igo lang gyod silang magbaktas kay walay matugutang mga sakyanan nga makaagi sa ruta sa lumba.
RadyoMaN Aimee Guinita
