Roxas City, Capiz- Gindugokan sang mga manugbakal ang imported nga NFA rice nga gin-umpisahan na sa pagbaligya sa Teodoro Arcenas Trade Center.
Sa pihak sini, gin-athag ni Confederation of Grains Retailers Association of the Philippines, Inc. (GRECON) Roxas City Chapter President Edilberto Cambi nga limitado gid lamang ang ila pagbaligya. Suno diri, mahimo lang mabakal sang isa ka persona ang tubtob sa lima gid lamang ka kilo.
May yara man sang nagakaigo nga oras sang pagbaligyaanay nga magahalin alas 8:00 sang aga tubtob alas 11:30 sang udto kag ala una tubtob alas singko sang hapon.
Sa subong may yara sang 300 tanan ka mga sako sang NFA rice ang mga accredited retailers sa Teodoro Arcenas Trade Center kag ginalauman ang dugang nga mga sako sa masunod nga semana.
Sa matandaan nga sang nakaligad nga Hulyo 1, 2018, naka-abot na ang pahauna nga 4,500 ka sako gikan sa 10, 000 sang bugas nga gin-alokar sang NFA para sa probinsya sang Capiz.
Suno kay NFA-Capiz Information Officer Christie Harion ang nasambitan nga bugas ang na-deliver na sa warehouse sa Bolo, Roxas City kag sa banwa sang Dumalag.
Ginpahayag sini dugang nga lauman nga maga-abot anuman nga adlaw subong nga semana ang dugang nga volume sang bugas.
Ginapahayag nga timely ang pag-abot sang nasambitan nga supply bangod ang bulan sang Hulyo amo ang ginakabig nga lean month bangod man nga wala pa sang harvest ang mga olumhan.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
