Davao City – Lauman nga sugdan karong bulana ang pagkonektar sa Times Beach ug Sta. Ana Wharf area atol sa nagapadayong Davao City Coastal Bypass Road.
Sa pakighinabi kang Department of Public Works and Highways (DPWH-XI) Regional Director Allan Borromeo, gibutyag niini nga adunay P3 billion nga budget ang gi-alokar alang sa 2.6 kilometros nga coastal road project alang sa tuig 2018 nga maoy mukonektar sa 2017 project sa Bago Aplaya paingon sa Times Beach ug laumang mahuman sa tuig 2022.
Dugang ni Borromeo, adunay upat ka lanes ang 26 ka metros nga coastal road diin aduna usab kini bicycle lane ug sidewalk.
“Gawas ana naa tay esplanan, duha ka buok parks diha (Boulevard), para naa po’y masuroyan ang mga tawo ug mapasigarbo sa mga turista,” segun niini.
Samtang giseguro usab sa Regional Director sa DPWH-XI nga luwas ug sakto lang ang upat ka metros nga halapad sa bicycle lane aron malikay sa disgrasya sa kadalanan.
RadyoMaN Jason Amisola
