Davao City – Kabalaka, kahadlok ang gibati sa pipila ka mga ginikanan sa mga estudyanteng nagtungha sa Crossing Bayabas National High School sa Toril ning syudad sa Davao human sa nahitabong insidente kaganinang buntag, July 10, 2019 diin anaa sa kapin gatus ka mga magtutungha ang gitabang tungod sa panic nga nahitabo atol sa linog.
Sa interbyu sa DXDC RMN Davao kang Jesme Dagoy, usa ka inahan nga naabtan sa team nga nangita sa iyang anak, dali-dali kini miadto sa skwelahan aron adtuon ang iyang anak human nakadungog sa silingan nga daghang estduyante ang nakuyapan ug gipangdala sa ospital.
“Nanguli sila, akong anak wala unya nagpahibalo sa akoa nga ang grade 8 ug 9 daghan nakuyapan, nakulbaan nako,” segun ni Mrs. Dagoy.
Hinuon nasuta niini nga anaa ra sa luwas nga kahimtang ang iyahang anak.
Kahinumduman nga anaa sa 175 ka mga estudyante ang natalang gitabang sa maong tulunghaan human matud pa nag-panic ug nahadlok tungod sa mitay-ug nga magnitude 4.9 nga linog apan ang uban niini naulian na kun nakagawas na sa ospital.
Gani giklaro ni Roy Chatto, Prefect of Discipline sa tulunghaan nga walay nahitabo nga stampede ingon man walay mga estudyanteng nasudlan og dautang espiritu.
Hinuon giangkon niini nga adunay mga crack nga nasuta sa mga buildings apan dili tinuod nga adunay nahugmak.
RadyoMaN Renz Barbarona
