Davao City – Dili moubos sa 300 hangtud 400 ka balay sa lungsod sa Matan-ao, Davao Del Sur dili na mapuy-an pa sa mga residente human nadamyos sa Magnitude 6.9 nga linog, subay kini sa datos gikan sa Matan-ao Municipal Disaster Risk Reduction Management Office.
Matud ni MDRRMO Head Bernadeth Baldivia, ang Matan-ao Country Homes sa Purok Agan sa Barangay Poblacion maoy adunay pinakadaghang mga balay nga nadamyos tungod sa kakusog sa linog nga nahitabo niadtong Domingo sa hapon.
Gumikan sa kakusog sa pag-untol ug pag-ayag sa yuta, ang footing sa mga konkreto ug kadtong ginama sa light material nga mga balay nawala sa ilang linyada hinungdan sa pagkahugno, segun ni Baldivia.
Wala gilimod ni Baldivia nga sagad sa mga balay sa ilang lungsod walay mga building permits ug inato ra usab ang pagkatrabaho, busa dihang niigo ang linog, nangawala sa linyada ang footing nga nagresulta sa pagkahugno sa mga pinuy-anan.
Una nang gimando ni Matan-ao Mayor Vincent Fernandez ngadto sa iyang katawhan nga i-abandona ug dili una estaran ang ilang mga panimalay gumikan sa kabalaka nga basin mubalik ang kusog nga linog ug mabutang na usab sa tumang kaalanganin ang ilang kinabuhi ug kahimtang.
Gibatbat ni Baldivia nga ila na karong girekomendar ngadto sa kagamhanang lokal sa Matan-ao ang pag-require sa mga motukod og establisimiyento nga maglukat una og building permits ug magpatabang sa mga eksperto aron maseguro ang kalig-on sa mga gambalay nga molahutay bisan pa’g kusog ang linog.
RadyoMan Joel Viray
