Davao City – Gipaniguro sa Department of Health (DOH) nga mahatagan og prayoridad ang mga senior citizen alang sa Coronavirus Disease 2019 (COVID-19) vaccine diin nabutang kini sa category A2 sa vaccination program sa gobyerno.
Sa One Davao on COVID-19 Virtual Presser, gikanayon ni Dra. Annabelle Yumang, DOH-XI Regional Director nga hugot ang ilang koordinasyon sa Department of Social Welfare and Development (DSWD) sa pagkuha sa masterlist niini lakip na ang indigent senior citizens.
Samtang, ginaproseso na usab ang confidentiality agreement nga gikinahanglan usab sa DSWD alang sa programa.
“So in close coordination pud ‘ta sa atong senior citizen federation president kay sila pud ang duna poy mga listahan kung kinsa ang ilang mga member,” segun ni Yumang.
Gi-awhag ang tanang senior citizens nga aktibong magpalista sa tagsa-tagsa ka munisipyo o sa barangay alang sa pagpabakuna.
Nasayran nga anaa sa 77,000 senior citizens dinhi lamang sa syudad sa Davao ang target nga bakunahan oras nga mahuman na usab nga ma-vaccinate ang mga frontline health workers.
RadyoMaN Kirby Manzon
