Hayan laing kalamboan ang mosulod sa dakbayan sa Dipolog gumikan kay hatagan na ug pagtugot ang Lite Shipping Corporation (LSC), usa ka kompanya sa barko nga makabyahe ang ilang duha ka mga barko sa rota nga gikan sa dakbayan sa Dipolog padulong sa isla sa Kabisay-an.
Atol sa regular nga sesyon sa Sangguniang Panlungsod sa Dipolog, usa ka resolusyon ang gipasar sa konseho nga naghatag ug suporta sa maong kompanya sa barko.
Nasayran, nga ang Lite Shipping Corporation mihangyo sa syudad nga mahatagan ug pagtugot nga maka-operate ang ilang duha ka mga barko sa Dipolog ug mahatagan ug priority berthing privilege sa Galas Feeder Port.
Matud pa ni Chief Operating Officer ug president sa LSC nga si Lucio Roger Enerio Lim Jr., nga anaa na sila sa 25 ka tuig sa maong patigayon ug daghan na ang ilang barko nga nagbyahe sa lain-laing dapit sa Visayas ug ubang parte sa Mindanao.
Ilado usab nila pa ang ilang mga barko nga limpyo ug 90% sa mga makina parehong bag-o.
Ang plano sa LSC nga adunay duha ka mga barko nga mo-byahe kada adlaw sa nahisgutang rota sa unahan. *(M.L)*
