RMN Laoag – Kiniddaw ni LMP Ilocos Norte President Erdio Valenzuela kadagiti kandidato iti nasao a probinsia nga agtalinaed kuma ti nakapia a panangisayangkat ti panagkampanya iti lokal.
Imbatad daytoy ti Mayor kalpasan nga adda dagiti opisyal wenno kandidato a makaaw-awat latta ti pamutbuteng manipud kadagiti agsinumbangir a partido.
Iti naglabas a tawen, adu dagiti nagbalin nga areas of concern ti Philippine National Police gapu pay laeng iti naruay a pangta ti biag kasta pay ti krimen kas kuma ti pannakapapatay ti dati a Mayor iti ili ti Marcos a ni Arsenio Agustin.
Innayun pay ni Valenzuela a ti rekomendasyon manipud ti PNP ti matungpal nangnangruna nu ibilangda dagiti il-ili kas high alert status wenno “Hotspot”. Ni Valenzuela ket agpaidasig a bise-mayor iti daytoy nga eleksion nupay saan a nakompleto ti terminona.
Nupay kasta, nakasagana ti otoridad kadagiti nagduduma nga ili tapno maliklikan ti saan a napintas nga aramid bayat ti panagkampanya ditoy.
Malagip a nagpalagip iti Commission on Elections wenno COMELEC kadagiti kandidato nga aramidenda ti kasasaayatan a proseso ti panagkampanya ken liklikan ti panagaapa, nangnangruna unay intuno Mayo 13, aldaw ti Eleksion.
Bernard Ver, RMN News
