TACLOBAN CITY – Nagviral yana ha social media an litrato nga nagpapakita han “inappropriate hairstyles for students”, usa ha rules han Leyte Normal University nga ginpost ha Facebook han LNU Student council han mao nga Unibersidad.
Usa ha mga litrato hi Bretman Rock, usa nga sikat nga twitter personality an nagkomento ha mao nga litrato, sumala ha iya, diri makaka-apekto an panul-uton ha pag-aram han mga estudyante.
Ha litrato, makikit-an an mga haglaba nga buhok han mga kalalakin-an nga ginlabel kumo “inappropriate”. Apil gihapon ha litrato an “improper grooming for men” kasunod hini an mga litrato han lalaki nga mayada facial hair, ariyos, make-up ngan panbabayi nga surul-uton.
Nagreact naman dinhi an mga netizens, sumala kan Sam Min Ha, waray hiya confidence dida han nag-aaram pa hiya ha LNU.
Siring naman ni Marnie Lizeth, an issue dinhi an paggamit han litrato nga waray magsarit ha tag-iya.
Sumala naman kan Marie Tonette Marticio, proud la gihapon hiya ha pagigin normalista tungod nga naa-apreciate niya an desiplina ha sakob han eskwelahan, baga daw ini kun masakob ka ha panimalay nga kinahanglan nimo hubu-on an imo tsenilas antis sumakob.
Ha pagka-yana, gindelete na han LNU Student council an mao nga post ngan waray pa official statement an LNU hini nga issue.
