HINANALING PAGTIGUM SA MGA POC’S DINHI SA REHIYON GIDASIG SA DILG-IX
Hugtanon karong gidasig sa rehiyonal nga buhatan sa DILG ang tanang mga hepe ehekutibo sa mga kagamhanang lokal dinhi sa Zamboanga Peninsula Region alang sa hinanalling pagpatawag ug panagtigum sa ilang matag Peace and Order Council dinha sa ilang matag lokalidad. Kining maong kalamboan ang nasayran basi sa regional memorandum circular no. 2019-03 nga giluwatan sa rehiyonal nga buhatan sa DILG pinetsahan ug Enero 28, pinirmahan ni DILG Regional Director Paisal O. Abutazil alang sa maong katuyu-an. Sigun sa dugang nasayran nga kining nahisgotang memorandum ang giluwatan sa tumong nga ang mga POC’s dinhi sa rehiyon ang makahimo sa hinanaling panagtigum aron kini makahisgot ug makahimo sa pagsusi sa kasamtangang kahimtang sa kahapsay ug kalinaw ug sa kahimtang sa seguridad dinha sa ilang matag dapit. Gawas niini, lakip usab sa pagahisgotan mao ang pagpalig-on sa mga lakang pang-seguridad, duyog na sa hugot nga koordinasyon sa mga tukmang otoridad, alang sa pagpakgang o pagsumpo sa bisan unsang mga pagpanghasi dinhi sulod sa atong rehiyon, aron masiguro ang kaluwasan sa mga katawhan, ilabi na dinha sa mga pampublilkong dapit ug mga balay alampo-anan.(CIO-alb)
CIVIL REGISTRATION MONTH GISAULOG
Uban sa temang “Inclusive and responsive CRVS: Working smarter through innovation”, malampusong gibuksan ang pagsaulog sa “Civil Registration Month” didto sa Mission Dei Hotel ning dakbayan kaniadtong Pebrero 1 hangtod 2 ning tuiga.
Ang maong pagsaulog ang gipasiugdahan sa rehiyunal nga kahugpungan sa mga Civil Registrars’ nga nagagikan sa mga probinsya sa Zamboanga del Norte, Zamboanga del Sur ug Zamboanga Sibugay uban sa rehiyunal nga buhatan Philippine Statistics Authority.
Atol sa maong pagbukas, si Mayor Darel Dexter T. Uy ang mihatag sa iyang mensahe diin iyang gipadangat ang iyang kalipay nga ang dakbayan sa Dipolog ang gipiling dapit alang sa pagpahigayon ning kasaulogan uban sa pagpasigarbo sa mga kalampusan nga nakab-ot sa dakbayan diin kining tanan nahimong posible pinaagi sa katawhan ug tungod usab sa pagserbisyo sa Civil Registry nga unang lakang sa paghatag kanila ug mga katungod isip usa ka lumolupyo sa dakbayan.
Dugang pa sa batan-ong mayor nga ang kagamhanang lokal ang padayon gihapon sa pagpahigayon ug mga lakang sa pagserbisyo sa katawhan sama sa Barangay Caravan nga naglakip sa paghatag ug kahigayonan nga kahatagan ug pagtagad kadtong mga katawhan nga walay Birth Certificates dinhi sa dakbayan, lakip na ang pagpahigayon sa Mobile Registration Program pinaagi sa buhatan sa City Civil Registrar ubos sa pagdumala ni CCR Rosemarie Miranda.
Si Region Nine Association Of Civil Registrars’, Inc. President Mr. Samson S. Barrientos ang mihatag usab sa iyang mensahe, diin matod niini nga gikinahanglan ang labaw nga pag-pokus dinha sa ilang mga responsibilidad bisan pa man sa mga hagit ug problema ug sa pagsiguro nga ang matag tawo maalagaran ug mahatagan sa ilang legal nga pag-ila.
Alayon sa maong pagsaulog, gipahigayon usab ang Regional Planning Workshop on Civil Registration sama sa Pre-Marriage Orientation and Counseling Program, Updates on the Philippine Identification System, Consultative Forum on the 2019 Revised Registry Forms ug uban pa.(CIO-JMT)
MGA MIKANDIDATA SA MS. BJMP MIKORTESIYA NGADTO KANG MAYOR UY
February 7- Mainiton nga gi-abi-abi ni Mayor Darel Dexter T. Uy ang 9 ka mga mikandidata sa “Ms. BJMP” sa miaging tuig nga gi-representahan sa mga nagkalain-laing jail officers gikan sa mga nagkalain-laing rehiyon dinhi sa nasud, atol sa gipahigayong courtesy call ngadto kang Mayor Darel Dexter T. Uy kaniadtong Pebrero 6, 2019.
Nasayran nga ang Ms. BJMP maoy usa ka prestihiyosong kompetisyon alang sa mga kababayen-ang jail officers, alayon sa “Jail Bureau’s 27th Weeklong Founding Anniversary Celebration.”
Dugang pang nasayran nga ang Search for “Ms. BJMP” maoy usa ka aktibidad nga gipahigayon matag tuig sa maong ahensiya, aron sa pagsaulog ug sa paghugpong sa mga kababayen-ang jail officers, isip mga “empowered women” ug sa pagpahinomdom usab ngadto kanila ug sa mga katawhan sa mahinungdanong papel nga ilang gikuptan sa katilingban.
Alayon niini, sila ang magpahigayon ug community outreach ug Operation Plan Toktok Dalaw (Oplan Toklaw) alang na ngadto sa mga “persons deprived of liberty” nga wala na mabisitahan sa ilang tagsa-tagsa ka mga pamilya.
Si Mayor Darel Dexter T. Uy ang mipaabot usab sa iyang dakong pahalipay ngadto sa mga kababayen-ang BJMP, ingon man nga sila usab ang mamahimong magmalamposon sa ilang adbokasiya. (CIO-GPV)
TEMPORARYONG PAGKOMPONI SA MACASOY BRIDGE IPAHIGAYON
Ang pamunoan sa DPWH, 3rd Engineering District Office nga nahimutang didto Barangay Segabe, lungsod sa Pinan, ning lalawigan, ilawom sa pagdumala ni OIC-District Engineer, Veronco O. Micarandayo, ang nagpahibalo karon sa hinanaling temporaryong pagsira sa Macasoy Bridge subay sa Dipolog-Oroquieta nga dalan ngadto sa tanang mga sakyanan alang sa pagkomponi. Mao kini ang unod sa sulat gikan sa nasangpit nga buhatan nga nadawat sa buhatan ni City Mayor Darel Dexter T. Uy niadtong nakalabay nga semana. Sumala pa sa unod sa maong sulat, nga ang Macasoy Bridge ang natukod niadtong pang tuig 1975, diin sa kadugayon sa pagserbisyo niini, nakabaton na kini ug mga diperensiya nga nagkinahanglan na ug pagkomponi alang sa kaluwasan sa sumasakay nga publiko, ilabi na niadtong mga bug-at nga mga sakyanan. Aron malikayan ang dili unyang damhong panghitabo gumikan sa kada-anong kahimtang sa maong tulay, nagkinahanglan na kini ug hinanaling pagkomponi, diin ang pag-agi ning maong tulay sa mga sakyanan ang pagadumalahon ngadto sa mga sakyanan nga nagbaton ug kinatibuk-ang gibug-aton nga wala molapas sa 5 toneladas lamang. Subay ning kalamboan, nagpahibalo karon ang DPWH, 3rd Engineering District ngadto sa mga sumasakay nga publiko ug sa tanang mga sakyanan kalabot ning maong kalamboan, aron malikayan ang kahasol gumikan ning temporaryong pagsira ning maong tulay. Sumala pa nga ang mga sakyanan de karga nag nagbaton ug sobra sa 5 toneladas ang gibug-aton nga nagagikan sa dakbayan sa Ozamis ug sa mga kasilinganang dapit nga mopadulong nganhi sa dakbayan sa Dipolog, Pulauan Port, sa Dapitan ug vice versa ang temporaryong “i-re-route”, ug gi-awhagan nga moagi ning mga mosunod:
1. Barcelona-Pinan-Polanco-Dipolog (Dipolog-Oroquieta Highway)
2. Ilaya-Isis-Polanco Road agi sa Leop, Dapitan City, nga mogawas didto sa Conacon padulong sa Polanco dayon lahos sa dakbayan sa Dipolog.
Alayon ning maong pagtrabaho, gihangyo sa buhatan sa DPWH 3rd Engineering District ang pagsabot sa mga sumasakay nga publiko, sanglit nga ang katuyu-an ning maong pagtrabaho mao man ang pagpalig-on sa Macasoy Bridge, uban sa pagpasalig nga pagkatapos ning maong pagkomponi, ang maong tulay ang paga-buksan na ug balik ngadto sa mga sumasakay nga publiko.(CIO-alb)
