Davao City – Posibleng pagasugdan og tuon sa City Transport and Traffic Management Office kun CTTMO ang mga bag-ong routa sa sakyanan dinhi sa syudad sa Davao karong tuiga.
Kini ang gibutyag ni CTTMO head Dionesio Abude atol sa interbyu sa DXDC RMN Davao diin subay kini sa ilang ginatawag nga Local Public Transport Route Plan.
“Nagplano pa aning gitawag nato nga Local Public Transport Route Plan pero wala pa sugdi, naa namay manual nga gipadala sa DOTr ug LTFRB para maoy mahimong guide sa pagplano sa pagpangita og mga routa,” sigun ni Abude.
Dugang ni Abude posibleng karong bulana sugdan ang nasangpit nga plano.
Sa pikas bahin, dako og tabang sumala pa ni Abude ang pag-abri sa Talomo-Puan Bypass Road tungod naluag-luagan ang bug-at nga trapiko sa may Ulas nga bahin gani lakip na usab ang dagan sa trapiko padulong downtown gikan sa South ug padulong sa Bukdinon area.
Kahinudmuman nga giabrihan ang maong bypass road kaniadtong December 22, 2017 diin duna kini kantidad nga P208-million.
RadyoMaN Renz Barbarona
