General Santos City–Nagpabilin pa karon ang presensiya sa mga lokal nga teroristang grupo sa pipila ka mga lugar sa Sarangani Province. Kini ang gikumperma ni Police Chief Inspector Niel Wadingan, ang tigpamaba sa Police Provincial Headquarters nga nakabase sa Sarangani Province.
Matud pa ni PCI Wadingan nga duna pa silay namonitor karon nga nahibiling mga sakop sa Ansar Al Khilafah Philippines sa Maasim, Kiamba og Maitum area. Gawas pa sa mga myembro og sympathizers sa AKP aduna pay ubay ubay nga grupo sa pipila ka mga bandidong grupo nga naglihok sa maong Probinsiya.
Luyo kini sa pagkamatay sa lider sa AKP nga si Mohammad Jaafar Sabiwang “Tokboy” Maguid atol sa gilusad nga operasyon sa kapulisan og military kaniadtong milabayng bulan sa Enero 2017.
Kahibaluan nga pipila pa ka mga high value target ang nasikop sa Philippine Drugs Enforcement Agency kon PDEA12 tungod sa paglambigit sa iligal nga droga sa maong Probinsiya.
Kahinumduman nga sunod sunod karon bag-ohay lamang nga nasikop ang pipila ka mga gibansagang mga Narcpolicitician sama na lamang nilang Maasim Mayor Anecito Lopez og sa barangay Kagawad nga nasikop usab tungod sa paghupot og mga iligal nga droga og armas.
Gibasihan matud pa sa kapulisan, PDEA og militar ang nakuhang video niadtong tuig 2016 kung asa Makita ang pakig alyansa ni Tokboy Maguid ngadto sa “Emir” sa ISIS sa Pilipinas ug lider sa bandidong Grupong Abu Sayyaf nga si Isnilon Hapilon. Una ng milutaw nga ang Al Khilafah Philippines ang orihinal nga nakabase sa Maasim Sarangani Province nga gitudlong hangtod karon dunay koniksiyon sa ISIS sa Syria. (Emir Bariquit)
