Padayon ang pagsaka sa local transmission sa COVID-19 sa probinsya sa Bukidnon.
Sa interview sa RMN Malaybalay ngadto kang Dr. Garry Guido Tabios, ang provincial health officer sa PHO-Bukidnon, gibutyag niini nga usa kini sa highlights nga ilang gihisgutan atol sa ilang panagtigum nga gihimo kagahapon nga gipangunahan ni Governor Jose Maria Zubiri kauban ang 22 ka mga mayores, mga chief of public hospitals, PNP ug AFP.
Matud ni Dr. Tabios nga as of kagahapon, (October 5, 2020) anaa na sa 300 kapin ang total nga kumpirmadong kaso sa COVID-19 sa probinsya nga adunay 129 ang aktibo.
Sigun niya nga ang problema karon tungod kay sa nakalabay nga usa ka bulan nisaka pa ang local transmission sa lalawigan.
Lauman usab daw nga sa musunod nga adlaw, semana ug bulan padayon ang pagtaas sa local transmission.
Gipahayag ni Dr. Tabios nga gimando usab daw sa gobernador ngadto sa mga local government unit ug kapulisan ang istriktong pagpatuman sa mga health protocols ilabina sa mga borders.
Nasayran nga natala sa Valencia City ang 27 ka mga bag-ong positibong kaso sa COVID-19 kagahapon basi sa anunsyo sa DOH.
Ang mao nga ihap maoy pinakataas nga natala sulod lamang sa usa ka adlaw.
