Log-in Log-out System, ginapatuman na sa pila ka mga barangay sa Roxas City!

20

Roxas City, Capiz – Ginkumpirmar ni Punong Barangay Ligaya Condez sang Brgy Jumaguicjic Roxas City nga mas nag-strikto sila sa pagpasulod sang mga persona sa ila nga barangay.


Umpisa sang nagligad nga gab-i, hugot nila nga ginpatuman ang checkpoint kag log-in log-out nga sistema partikular sa mga nagapauli nga halin sa Barangay Culasi.

Ginklaro sang kapitan nga wala ang mga ini ginabawalan nga magsulod sa housing.
Suno pa kay Condez, ini ang kabahin gid lamang sang obligasyon agud nga mangin mas madali ang contact tracing pananglitan nga may magpositibo sa COVID-19 sa amu nga lugar.

Samtang, masobra na sa 15 ka adlaw nga ginapatuman sa Barangay Barra, Roxas City ang Log-in Log-out nga sistema sa mga persona nga nagasulod sa amo nga barangay.

Ginsiling ni Kapitan Ernie “Bobot” Borreros nga kun indi sang residente ang isa ka persona, kinahanglan nga magbilin ini sang Identification Card sa Tanod Outpost kag ini ang kuhaon man kun magbiya na sila sa lugar.

Sa bulig sang katapo sang kapulisan, barangay tanod kag barangay council, naglibot ang mga ini sa mga panimalay sa barangay Barra agud nga ikampanya ang mandatory nga pagsuksok sang face mask.

May kaangtanan sini, nagapangayo naman sang pag-intindi si Kapitan Borreros sa mga taga-barangay Barra bangud ang luyag kag tinutuyo lamang nila amu nga maproteksyonan nga matapikan sang virus ang mga residente.




Samtang nagpatuman man sang kasubong nga sistema ang pamunoan sang Barangay Culasi agud nga ma-monitor ang mga tawo nga nagasulod kag pagguha sa ila nga barangay.

Facebook Comments