Maaari nang isumbong ngayon ang anumang insidente ng harassment laban sa frontliners at sa mga Coronavirus Disease o COVID-19 patients sa Lungsod ng Pasay.
Ito’y sa pamamagitan ng ilnilunsad na anti-bullying hotline ng Lokal na Pamahalaan na layong tulungan ang mga nakakaranas ng diskriminasyon dahil sa COVID-19.
Ayon sa Pasay Public Information Office, kailangang isumite ng complainant o biktima ang kanyang report of harassment kasama ng pangalan, contact number at address.
Maaari itong maipadala sa mga numerong: 0961-6804984, 0966-2473608, 0928-6563958, 0922-7493800 at 0950-1987703.
Pwede rin silang tawagan mula alas-8:00 ng umaga hanggang alas-5:00 ng hapon at maaari rin tumanggap ng text messages mula alas-5:01 ng hapon hanggang alas-7:59 ng umaga kinabukasan.
Matatandaan na nagpasa ng ordinansa ang pamahalaang panlungsod para protektahan ang frontliners, COVID-19 patients at suspected carriers laban sa diskriminasyon kung saan pagmumultahin ng ₱5,000 ang sinumang lalabag at maaaring makulong ng hanggang anim na buwan.
Sa ngayon, base sa datos ng Pasay City Health Office, nasa 183 na ang kumpirmadong kaso ng COVID-19 sa lungsod, 444 ang probable at 60 ang suspected cases.
Aabot naman sa 20 ang namatay habang 40 na residente ng Pasay ang gumaling sa COVID-19.
