General Santos City— Patay ang usa ka caretaker human kining gitigbas sa makadaghang higayon milabay’ng Dominggo sa hapon sa gibantayan niining manggahan nga nahimutang sa Brgy. Batomelong.
Giila ni Police Senior Inspector Reynaldo Rojo, Deputy Station Commander sa Police Station 8 ang biktima nga usa ka Loloy Ramos, 60 anyos ug stay-in sa manggahan nga gipanag-iyahan sa usa ka Ernesto Wadyan.
Samtang ang suspek nailang si Jerevy Encipedo, 16 anyos nga residente sa Brgy. Batomelong ning dakbayan. Dugang pamahayag ni PSI Rojo nga basi sa inisyal nga pagsuta, napuno ang suspek tungod sa mga pagpangbully kaniya sa biktima higayon nga kini mahubog.
Rason nga dihang nakakita ug higayon, iyahang gitigbas ang biktima kung asa ubay-ubay matud pa nga samad tinigbasan ang naangkon niini sa managlahing parte sa iyahang lawas.
Gituuhang nakatulog ang biktima dihang nahitabo ang krimen.
Sa karon, padayon pang gipangita ang suspek nga paspas nga mibibat human ang maong pagpanigbas. (picture for illustration)
