Roxas City, Capiz- Naglab-ot sa 30 ka bilog nga nagkatuhay nga sahe sang armasluthang kag eksplosibo ang boluntaryo nga ginturn-over sa mga kapulisan sa Capiz dala sang mas ginpasangkad nga kampanya nga ginatawag “One Time, Big Time” intel-driven operations subong nga adlaw Mayo 8, 2018 sa pagpanguna sang Provincial Intelligence Branch sang Capiz PNP.
Ang amo nga mga armasluthang ang pormal nga ginpresentar ni Provincial Intelligence Branch head Police Chief Inspector Roel Bucat kag CPPO Provincial Director Samuel Nacion sa ginpatigayon nga programa kaina sang aga sa Camp Teodorico Apil sa Brgy. Lanot.
Samtang suno naman kay CPPO Information Officer SPO3 Donna Asmod, lakip ang 54 ka mga ginsurrender nga armasluthang sa tion lamang sang election period nga nag-umpisa sang Abril 14, may yara na sang kabug-osan nga 84 ka mga armasluthang ang narekober sang kapulisan paagi sa ginkasa nga mga police checkpoints kag pagpadulong sa mga poluy-an agod nga henyuon nga boluntaryo nga i-surrender ang mga armasluthang.
Gindugang ni Asmod nga ini ang kabahin lamang sang mga tikang sang kapulisan agod nga malikawan ang ano man nga sahe sang kalakasan sa tion sang eleksyon sa Mayo 14, 2018. Suno pa diri nga indi lamang subong nga adlaw ang amo nga kampanya sang kapulisan kundi ini ang magapadayon.
Sa mensahe naman ni CPPO Provincial Director Samuel Nacion, ginakalipay sini ang padayon nga suporta sang publiko sa kampanya kontra loose firearms, implementasyon sang Comelec Gun Ban, peace covenant signing kag information campaign para sa Safe Barangay kag Sk Election(BSKE) 2018.
Ginganyat man sini ang tanan lakip na ang mga gun holders nga nag-expire na ang lisensya sang armasluthang nga kun mahimo boluntaryo nga i-surrender sa mga otoridad ang mga ginahuptan nga armasluthang.
