Dipolog City – Linibo ka pesos nga halin ang nahanaw sa dihang giransak sa wala pa matumbok nga mga suspetsado ang lotto outlet nga nagbase sa purok bougainvilla, barangay gulayon, dakbayan sa dipolog.
Ang nahanaw nga halin sa tiket naglangkob sa kita sa maong lotto outlet nga mokabat sa 5,390.00 ka pesos.
Ang caretaker sa maong lotto outlet nga si Vicente Obonga, mireport sa kapolisan kagahapon niana nang pagka-alas 11:31 sa udto.
Ang police imbestigador sa dipolog pnp daling ni-imbestiga sa dapit, didto nasuta nga giguba sa suspek o mga suspek ang bungbong nga gama sa light materials, kilid nga bahin sa maong outlet hinungdan nga nakasulod kini ug gikuha ang nahisgutang kwarta.
Gibanabana ni Vicente nga posibleng nahitabo ang pagpanransak sa mga oras gikan sa alas 1:00 sa kadlawon niadtong adlaw’ng lunes ngadto na sa alas 3 sa kaadlawon.
Niadtong tungora mingaw na ang dapit ug posible nga gipahimuslan sa mga suspek ang higayon pagguba sa maong lotto outlet.
Ang kapolisan sa dipolog padayon pa sa ilang imbestigasyon pagtumbok sa mga suspetsado.
