Report ni: Jennifer Palomo Debaja
Pagadal-on na subong nga adlaw sa Himamaylan ang bangkay sang OFW nga gintiro patay sang Mayo 19, 2018 sa atubang sang ila puluy an sa Purok 1, Brgy. Pinagkawitan, Lipa City Batangas.
Ginapatihan ” Love Triangle” ang motibo sa pagpatay kay Danilo Jenson Tereul, 57 anyos isa ka OFW sa Saudi Arabia kag tumandok sang Himamaylan, Negros Occidental.
Arestado ang asawa sang napatay kag ang driver lover sini bilang mastermind sa nasambit nga krimen .
Sa imbistigasyon sang Lipa City Police, gin ako sang suspek nga si Ruel Guico nga may relasyon sila ni Janet Capalad, misis ni Danilo rason kon ngaa gin papatay nila ang biktima.
Nahibaluan nga kaupod sa trabaho sang mag asawa nga Janet kag Danilo si Ruel Guico nga isa ka driver sa pamilya nga ila gina obrahan sa Saudi Arabia.
Nauna nga nag pauli sa Pilipinas si Ruel kag siya pa ang nagsugat sa mag asawa sa Airport sang Mayo 19.
Pag abot sa balay sang biktima sa Purok 1, Brgy Pinagkawitan, Lipa City gulpi na lang ini siya gintiro sa ulo sang gunman nga amunan ang gintunaan sang iya kamatayon.
Samtang, indi gid makapati ang iloy ni Danilo nga bangkay na siya nga makapauli. Sa pahayag sang utod sini nga si Ray Jenson, naka skedyul na ang Family Reunion sa pag abot sang utod kag ang matuod naka preparar na ang ila mga ilihawon para sa pagahiwaton kon tani nga pagtililipon sang ila pamilya.
Ginpaidalom na sa manhunt operation sang CALABARZON PNP ang gunman.
