General Santos City—Patay ang usa ka bana nga wala nipalit ug bugas alang sa iyang pamilya human gidunggab sa iyang asawa sa may Lun masla, Malapatan, Sarangani Province.
Biktima giilang si Eliezer Herbias, 54 anyos ug lumulupyo sa Purok Compulsory, Barangay Lun Masla, Malapatan, Sarangani Province, samtang ang asawang suspek giilang si Pauline Herbias, 37 anyos, residenti sa samang lugar.
Subay sa inisyal nga imbistigasyon sa Malapatan Municipal Police Station ala 1:00 ang takna sa kabuntagon dihang gidunggab sa ginang ang iyang bana samtang hubog nga natulog sulod sa payag nga ilang gipuy-an.
Gabie ayha nahitabo ang pagpanunggab, naglalis ang biktima ug ang suspek gumikan wala silay bugas nga lung-agon sa ilang panihapon. Human naglalis nakig-inum ang biktima sa iyang mga amigo ug hubog nang miuli sa ilang payag.
Tungod sa dili na maagwanta nga batasan sa iyang bana sama nalang sa pagpangulata kaniya ug sa ilang mga anak ug wala sa lugar nga pagpanelos niini ug ang pagka-eresponsabli sa ilang pamilya nakahuna-huna ang ginang nga patyon na lamang ang nasangpit pinaagi sa pagpanunggab.
Nahadlok sab kini nga basin siya na nuon ang maunhan sa biktima gumikan daan na kining nagbahad kaniya nga siya patyon higayon nga siya masakpang dunay laing lalaki.
Human sa pagpanunggab, mitahan dayon sa iyang kaugalingon ang suspek ngadto sa ilang Purok Chairman kansa maoy nag turn-over kaniya sa Kwerpo sa kapulisan.
