General Santos City–Love triangle ang usa sa mga motibong gilantaw karon sa Polomolok PNP kalabutan sa pagpamusil sa biktimang si Ronald Gayam, 46 anyos, heavy equipment operator nga taga Phase 5, Ozone Vill., barangay Mabuhay, Gensan diin suspek sa krimen mao si Alejandro Mimbrano Jr., 43 anyos, gwardya, residenti sa samang lugar.
Una nang gipusil sa suspek ang biktima alas 10:30 ang takna niadtong Domingo sa may Purok Mabuhay, Silway 8, Polomolok.
Sumala ni Police Captain Brandy Rasos, Deputy Chief Of Police sa Polomolok, Municipal Police Station nga sakay ang biktima sa iyang motorsiklo dihang siya gipusil sa suspek igo sa iyang dughan. Daling gidala sa ospitala ng biktima samtang suspek malampusong nadakpan.
Gikumperma usab ni Police Captain Rasos nga kuyog sa biktimang si Gayam ang asawa sa suspetsado nga itago lang sa pangalang Joy dihang nahitabo ang pagpamusil.
Sa inisyal nilang pag-imbistiga, adunay migula nga impormasyon nga adunay relasyon ang biktima ug asawa sa suspek.
Ila pa usab nga ginavalidate ang maong impormasyon. Nasayran nga sa kasamtangan wala pa naghatag ug pahayag ang asawa sa suspek nga si Joy ngadto sa kapulisan.
