Low quality nga mga CCTV Camera sa mga stablishemento sa dakbayan pangita-an og solosyon sa LGU Malaybalay

Gipaniguro karon sa lokal nga pangagamhanan sa dakbayan sa Malaybalay nga mapangita-an og solusyon ang nasinati-an karon nga problema diha sa pag-retrieve sa mga CCTV footage nga anaa sa mga istablishemento sa sentrong bahin sa dakbayan sa Malaybalay.

Kini gumikan sa nakitang kapakyasan nga makahatag og dugang mga impormasyon sa mga insidente nga matigayon ilabi na ang mga disgrasya sa mga kadalanan panahon og dunay mga aksidenti nga mahitabo.

Sa pamahayag ni Chief of Police sa Malaybalay City Police Station PLtCol. Julius Clark M. Macariola, atol sa gipahigayon nga panagtigum kagahapong adlawa, aminado kini nga sa kasamtangan walay tokmang standard ang mga gipang gamit nga CCTV karon sa dakbayan sa Malaybalay ug problima usab nila ang low quality niini ug dili insaktong pag function partikular sa mga lugar diin kini gi montar.

Dugang pa niini nga gipa-abot na sa kapulisan ngadto sa City Council ang maong problema ug duna na sumala pa gigahin nga pundo para sa pag sulbad sa maong problima.

Nasayran nga subling na utingkay ang problima sa mga minus nga kalidad sa mga CCTV footage sa dakbayan dihang usa ka fatal hit and run incident ang natigayon adtong kadlawon sa Domingo, Agosto 27, 2023 diin hangtud karon wala pa ma kab-ot sa kabanay sa biktima ang hustisya sa maong panghitabo.