Davao City – Pabor ang Land Transportation Franchising and Regulatory Board (LTFRB-XI) Davao Region nga mailisan na ang matang sa transportasyon gikan sa Public Utility Jeepneys (PUJ) ngadto sa bus system.
Gani, suportado ni LTFRB-XI Regional Director Atty.Armando Dioso ang programa ni Mayor Sara Duterte-Carpio nga High Priority Bus System (HPBS) isip pagbag-o sa matang sa transportasyon sa syudad.
Matud ni Dioso, mas maayo nga ang magdagan sa mga kadalanan sa dakbayan mao na ang mga bus de pasahero ug dili na ang mga PUJ.
Matud ni Dioso, mas bentaha sa parte sa mga pasahero ang bus system kay gawas nga luwas ang biyahe kumportable ang pagsakay malingaw sab ang mga pasahero tungod sa libre nga wifi.
Kung hingpit nang ipatuman ang High Priority Bus System, usa ka libo ka bus ang padagan sa tibuok siyo-dad hulip sa kapin siyete mil ka mga PUJ nga dunay lahi-lahi nga rota.
Suma ni Dioso, masulbad na gyod ang problema sa trapiko sa syudad kung ang mga bus na ang magbiyahe sa Davao City ikumpara sa gidaghanon sa mga sa unit sa PUJ nga mitala og 7,000 na.
Sa usa ka unit sa PUJ, walo hangtud sa siyam lang ka pasahero ang makasakay kun maakomudar apan sa bus, 40 ka tawo ang makasakay.
Gikontra usab ni Dioso ang pamahayag sa Piston ug Dabawenyo Kontra Jeepney Phaseout Coalition nga dili pa andam ang syudad sa HPBS gumikan sa kakuLang sa imprastraktura.
Depensa sa opisyal nga once mapatuman na sa hingpit ang HPBS, musunod usab ang pagpatindog og mga imprastraktura alang sa mga bus ug sa mga pasahero.
RadyoMaN Joel Viray
