Davao City – Nagtanyag karon ang Land Transportation Franchising and Regulatory Board (LTFRB) og special permit alang sa mga bus companies karong Undas aron masigurong ma-accomodate ang mga pasahero sa Davao City Overland Transport Terminal (DCOTT).
Sa interbyu sa DXDC RMN Davao kang Aiza Usop, DCOTT manager, gibutyag niini nga sa ilang pakig-alayon sa LTFRB, nagtanyag na kini og special permit labi na niadtong mga ruta nga daghan og pasahero apan nagkulang og bus nga mubiyahe.
“Ang atoang regional director sa LTFRB nag-ingon sa atong mga bus operator nga mo-apply sila og special permit tungod kay naa nay gi-open nga special permit atong mga ruta nga daghan og pasahero ug nagkulang ang atong mga bus,” saysay ni Usop.
Dugang ni Usop nga ugaling adunay guba ang mga bus units mamahimo kining ayuhon ug i-parking lamang sa garahi-an diin kung gikinahanglan kini nga mubiyahe, willing nga nga mo-isyu og special permit ang LTFRB diha sa DCOTT terminal.
“Willing pud nga mo-isyu og special permit ang atong LTFRB impromptu diha sa atong Ecoland terminal kung gikinahanglan gyud og maayo,” dugang ni Usop.
Gikumpirma usab sa DCOTT manager nga andam na ang Davao terminal nga mupatuman sa igong seguridad alang sa maayong biyahe sa Undas.
RadyoMaN Kirby Manzon
