LTFRB-XI: Expansion sa GrabCar sa Davao, tubag sa PUV shortage

Davao City – Dako ang mamahimong tabang sa pagsulod sa GrabCar sa syudad sa Davao, matud ni Land Transportation Franchising and Regulatory Board (LTFRB)-XI Regional Director Nonito Llanos III, atol sa Media Launch sa GrabCar sa usa ka hotel sa Lanang, Davao City kagahapong adlawa, October 13, 2023.

Sa mensahe ni Llanos, iyang gisulti nga ilahang gipaniguro ilabi na sa City Government of Davao, nga mahatagan og maayong serbisyo sa transportasyon ang Dabawenyos, diin gawas sa kasamtangang Public Utility Vehicles (PUVs) sama sa taxi, bus, ug High Priority Bus System (HPBS) sa umaabot, makatabang ang GrabCar tubag sa problema sa kakulangan sa panakayan sa dakbayan.

“We wanted to give the most convenient and the most comfortable ride for the people of Davao. Let us all remember that the tagline for Davao is, “Davao, Life is Here”. In the transportation sector, we wanted to make sure that life is really here in Davao through our public transport,” sulti ni Llanos.

Gibutyag sa LTFRB-XI official nga sa kasamtangan, anaa sa 200 units sa GrabCar ang naaprubahan ug anaa na sa kapin 100 ang nagabiyahe, diin kini dako usab nga tabang nga makamugna og oportunidad sa trabaho alang sa Dabawenyos.

RadyoMaN Kirby Manzon