Davao City – Dugang tulo (3) ka mga partner operators ang mipirma og kontrata sa Land Transportation Franchising and Regulatory Board (LTFRB)-XI alang sa ‘Libreng Sakay para sa Healthcare Workers’ isip pagpangandam alang sa Service Contracting Program Phase 2.
Ang maong mga kumpanya mao ang Nor Beli Jun Transit, Yellow Bus Line Inc., ug Land Car Inc.
Dako usab ang pagpasalamat ni LTFRB-XI Regional Director, Nonito Llanos III sa kooperasyon sa operator-partners paghatag og serbisyo labi panahon sa pandemya.
Una nang mipirma og kontrata ang Golden Valley Bus Line Corp., Davao ACF Bus Line, Bachelor Express Inc. ug Davao Metro Shuttle Corp alang sa maong programa.
Kagahapong adlawa lang usab (September 10, 2021) sa dihang gi-launch nationwide ang programa uban ang Department of Transportation (DoT) ug LTFRB.
Kinahanglan lamang nga atangan sa mga healthcare frontliners ang mga ruta sa ‘Libreng Sakay’ aron sila magiyahan sa pagsakay ug sa pagbiyahe.
RadyoMaN Kirby Manzon
