Gipahimangno kuman an mga motorista sa Land Transportation Office o LTO dire sa probinsiya na kinahanglan ipaubos sa emission test an ila mga sakyanan sa mga Emission Centers dire sa syudad, para masiguro na dili makadaot an mga aso na mugawas gikan sa ila mga sakyanan.
Gipasabot ni Engr. Manuel Del Carmen, an hepe sa LTO, na mas makadaot an mga aso na puti gikan sa mga tambutso, kontra sa aso na itom.
Kay an puti na aso, amo ini an Incomplete Combustion o an gasolina/fuel na waya masunog nan engine sa sakyanan, samtang an itom na asu amo ini an nasunog na fuel gikan sa sakyanan.
Pero laong ni Del Carmen, na an puti og itom na mga asu parehas na makadaot sa tawo ug sa palibot, pero mas kusog makadaot an puti.
An sakto gajud na himoon nan mga motorista, advice pa ni Del Carmen na mukadto gajud sa Emission Center kay sila man an makasukod kun sakto or dili an mga makina.
An mga accredited emission center dire sa syudad, an niabot ra sa upat.
Samtang, gibutyag pa ni Del Carmen na kada tuig jaoy joint force na pagpandakop an ila gihimo para na sa mga mulapas sa amo na balaod na langkoban nan mga kadagkoan sa DENR, DTI, PNP ug an ila opisina sa LTO .(RadyoMaN Winston Ensomo)
