Lugan a nakaparada, nauram iti siudad ti Laoag

299

iFM Laoag-Nauram ti maysa a lugan a nakaparada iti Brgy. 12 McKinley St. iti siudad ti Laoag.

Nabigbig ti agtagikua ti Toyota Lucida 1997 model a ni William Sarmiento Sahagun, agtawen ti 66, ken residente metlaeng iti lugar.


Segun kenni SFO2 Jay U. Simbol, ti Deputy Chief Fire Marshall iti BFP Laoag, manarimaan paylaeng ti imbestigasionda nu kasano ti pannakauram ti behikulo.

Kinunana a nakaawatda ti report a maururam ti maysa a balay isu’t gapuna a 3 ti firetruck a napan nagresponde ngem idi nakadanondan ket ditoyda nakita ti 90% ti behikulo a maururam.

Basar met ti palawag ti akin bagi, nabayagen a saan a maususar ti behikulo gapu ta adda perdina ken gapu iti pandemia ket awan pay dagiti partes nga usarenda a pangtarimaan.
Atapenna a dagiti ubbing a kaarrubada ti nakin aramid ti uram ta segun ti palawagna kanayonna nga anawaen ida a saanda pagayayaman ti lugan.

Innayunna nga adda iti nakaibaga kenkuana a tricycle driver nga idi limmabas isuna iti kalsada ket nariparna nga adda dagiti ubbing nga aggaayam ken nagbitbit ti maysa iti timba.



Malaksid ti daytoy ket plano ni Sahagun a palutpoten dagiti ubbing ken dagiti nagannakda.
Nairamraman a nadadael dagiti gamgamit iti kaasidegna partikular ti washing machine, cases ti botbotelya, lupot ken sumagmamano a gamit paglaba.


Awan met ti napasaktan ti insidente ken natalged dagiti bumalay nu man pay light materials iti balay. Patta patta nga umabot ti 150,000 ti balor dagiti nadadael. #iBalita
– Joe Anne Agustin, RMN News

Facebook Comments