Gi-turn-over niadtong Lunes sa kagamhanang lokal sa Tubod, Lanao del Norte, ngadto sa militar ang kapin 30 ka mga ihalas nga armas nga ilang nakolekta gikan sa 23 ka mga barangay.
Kini usa ka semana human gi-aprubahan sa Sangguniang Bayan sa nasangpit nga lungsod ang resolusyon nga nagsuporta sa pagpalugway sa Martial Law sa Mindanao.
Matud pa ni Mayor Leoncio Bagul, suportado nila ang pagpalugway sa Batas Militar sa Mindanao tungod kay ilang na-obserbahan nga mas luwas kung magpadayun ang implementasyon niini.
Gipakita usab nila, matud pa, ang ilang suporta sa kampanya ngadto Armed Forces of the Philippines ug sa Philippine National Police nga mamahimong stable ang kahusay ug kalinaw sa ilang lungsod.
Buhaton nila, matud pa ang tanan aron magpabiling malinawon ang ilang lugar.
Sa Vice Mayor Danny Yanoc, Jr. miingon nga makatabang usab ang Martial Law sa umaabot nga eleksiyon sa sunod tuig.
Si BGen. Thomas Sedano, commander sa 2nd Mechanize Infantry Brigade, Philippine Army, nalipay sa maong kalamboan tungod kay nagpasabot kini, matud pa, nga wala na magkinahanglan ang mga sibilyan sa ilang mga armas ug misalig na nga ang militar ug ang pulis maoy moprotektar kanila.
Nalipay usab siya nga sa kagamhanang lokal mismo madungog nga nakatabang ang pagpatuman sa Martial Law sa Mindanao. (Divina M. Suson)
| | Virus-free. www.avast.com |
