Davao City – Nahimong emosyunal ang usa ka ginikanan human kini naapektuhan sa nahitabong sunog sa Purok 9B Lower Madapo Brgy. 8-A, ning syudad, niadtong adlaw’ng Sabado sa hapon.
Atol sa interbyu kang Amelita Cejudo, biktima sa maong sunog nga gawas sa nabalaka kini gumikan sa pagkaugdaw sa napulo ka tuig na nila nga balay sa maong lugar, mas naguol kini sa mga gamiton sa iyang mga anak nga estudyante.
Saysay ni Cejudo nga parehong wala sila sa iyang panimalay atol sa pag-ulbo sa sunog nga likod lang sa ilang pinuy-anan kung asa usab nangatulog ang ilang lima sa unom ka mga anak lakip na ang 3-anyos nga kinamanghuran.
Maayo nalamang nakamata ug nabantayan sa ikaduha sa kinamaguwangan ang pagbusikad sa sunog.
Hinuon, gibutyag ni Cejudo nga nakadawat na sila og inisyal nga tabang gikan sa barangay ug CSSDO sama sa habol, banig, ug pagkaon diin nagpadayon sa pagkakaron ang validation sa 32 ka mga pamilya nga naapektuhan sa sunog.
Base sa inisyal nga imbestigasyon sa Bangoy Fire Station nanukad ang sunog sa balay sa usa ka Ricky Limbadan diin posibleng wala naibot nga appliance ang tinubdanan sa sunog ug miresulta sa pagkagdaw sa 29 ka mga panimalay.
Samtang gi-andam na sa RMN Foundation ang tabang sama sa mga used clothings nga gikan usab sa mga Kasama nga dunay malumong kasing-kasing aron mahatod sa mga biktima sa sunog.
RadyoMaN Jason Amisola, RadyoMaN Don Pulayao
