Nangin madinalag-on ang Pavia PNP sa pagserbe sang search warrant batuk sa subject nga si Peter Paul Gregori, 27 anyos sang Zone 2, Barangay Ungka 2, Pavia, Iloilo.
Mga alas 8 kahapon sang aga sang ginserbe sang kapulisan ang search warrant sa balay ni Gregori kon sa diin narecover diri ang isa ka ka 38 caliber revolver, isa ka single shot home made nga pusil, 6 ka bala sang 38 cal revolver, 9 ka bala sang m16, kag 1 ka holster sang 38 nga revolver.
Magluwas diri, narecover man sang mga pulis ang 25 ka sachet sang suspected shabu sa ibabaw sang lamesa kag ang cellphone sang subject.
Ginpahayag ni Police Chief Inspector Fernand Limbungan, hepe sang Pavia PNP nga sa cellphone ni Gregori, natukiban nga may nagatransaction pa diri nga mabaligya sang armas kabangdanan nga ila ini gin-operate nga nagresulta sa pagkadakop kay Joan Lauresta sang Tigum, Pavia.
Nakuha kay Lauresta ang isa ka 45 kalibre nga pistola, kag 15 mil pesos nga cash.
Magluwas kay Lauresta, may nag-text man kay Gregori natuhoy naman sa illegal nga druga kon sa diin gin-transact ini sang mga pulis nga matabu-ay sa City mall nga nagresulta naman sa pagkadakop kay Rolly Castor, 25 anyos, sang Rizal Pala-Pala City Proper nga nakuhaan sang isa ka sachet sang suspected shabu kag 2,000 pesos nga buy bust money.
Ginahanda na sang Pavia PNP ang kaso nga ipasaka batuk sa mga nagkaladakpan.
