Davao City – Napasaka na sa kapolisan sa Tagum City ang kaso batok sa suspek nga si Charlene Joyce Cruda, kansa suspek sa pagpatay sa iyang karelasyon nga usa ka magtutudlo nga si Teresa Mae Tero nahitabo niadtong adlaw’ng Lunes, Hulyo 1, 2019.
Sa interbyu sa RMN Davao kang Tagum City Police Office Spokesperson Police Capt. Anjanette Tirador nga kasong murder ang napasaka ngadto sa korte batok sa suspek.
Matud ni Tirador, subay sa ilang imbestigasyon ngadto sa pamilya sa maestra nga selos ang motibo sa pagpatay sa biktima ug buot na nga makigbulag ngadto sa suspek.
Kahinumdoman nga naligo na sa iyang kaugalingong dugo ang maong maestra ug wala nay kinabuhi human napalgan ibabaw sa kama human naka-angkon og samad sa iyang liog ug uban pang parte sa lawas sulod sa usa ka lawak sa Edilberto’s Bed And Breakfast Inn sa Apokon Road, Tagum City.
Sa pagkakaron ang patay’ng lawas sa biktima gihaya na sa ilang pinuy-anan sa Salvacion, Mawab, Comval Province, ug ilubong sa Hulyo 11, adlaw’ng Huwebes, sa La Filipina Public Cemetery sa syudad sa Tagum, Davao del Norte.
RadyoMaN Don Pulayao
