SYUDAD sang Iloilo – Gintayaan sa kutsilyo sa dughan kag ginkuha ang cellphone, kulintas kag P3,000 cash sang babaye nga nagalakat sa Iloilo Esplanade upod sa iya bestfriend, las 2:30 sang kaagahon, Lunes, Hunyo 17.
Suno kay Cassandra Alice Domingo, 24 anyos, teacher kag residente sang Lapaz kag Lea Mae Delos Santos, 26 anyos, service crew kag residente sang Sara, Iloilo nga nagalakat sila halin sa Smallville sang pag abot sa Esplanade malapit sa taytay, hinali sila gintayaan sang kutsilyo sang duha ka lalaki kag ginkuha ang ila cellphone kag bag.
Antes sini, ginhambalan pa ni Lea Mae si Cassandra nga taguon ang cellphone bangod may masugata sila nga duha ka lalaki.
Magluwas sa duha ka lalaki, nakita man nila ang upod sini nga amo ang nagaserbe driver sang motor.
Na identify nila ang mga suspek bangod wala ini sang tabon sa guya sang ginhimo ang krimen kag nagasuksok lang sang jacket.
Sang nakuha sang duha ka lalaki ang ila cellphone, nadugayan pa ini antes maglakat bangod ginpangayo pa nila ang password.
Matapos sini, gilayon sila nagpalagyo sakay sa motor dala ang mga kagamitan nga ila nakuha sa mga biktima.
ARESTADO
Nagpangayo sang bulig sa kapulisan ang mga biktima kag sang ginpakita ang pictures sa rogue’s gallery, positibo nila nga gin identify ang mga suspek.
Granada, Kutsilyo, kag 2 ka bulto nga shabu ang narecover sang kapulisan sa kustodiya sang mga arestado nga suspects nga gin kilala kanday Jushua Martinez, 18 anyos ( driver sang getaway vehicle), Roger Barrientos alyas Rambo, 44 anyos ( nagtaya sang kutsilyo sa isa sa mga biktima) kag Rocky Boy Barrientos, 18 anyos kag lunsay residente sang Barangay San Rafael, Mandurriao.
Lunsay ginpanginwala sang mga suspek ang insidente.
Suno sa ginatudlo nga driver nga si Jushua Martinez nga paanu sya maka drive motor kay indi sya makabalo mag drive kag tulog sya sang natabo ang insidente kag natampungawan sang gin-operate sang pulis.
Si Rocky Boy Barrientos naman nag pahayag nga ara sya sa ila puluy an kag mahamuok man nga naga katulog.
Desidido naman ang mga biktima nga pag pasaka sang kaso batok sa ila.
