Davao City – Cell phone lang sumala pa ang tuyo sa suspek kinsa mipatay sa duha ka mga babaye ug napalgan sa Brgy. Langub ning syudad sa Davao sa milabay’ng semana.
Sa eksklusibong interbyu sa RMN News Team kang Amay Bacus, 42 anyos, usa ka tricycle driver, taga-Brgy. Langub ning syduad sa tulumanong Kuskos Batikos Morning Edition, gi-angkon niini nga iyang gipatay ang mga ig-agaw sa iyang asawa nga sila alyas Mic ug Nak kinsa 17 ug 20 anyos, taga Datu Intan, Sta. Maria Davao Occidental, pulos nanarbaho isip katabang sa may Matina Aplaya ning syudad.
Segun niini nga una niyang nabuhat ang krimen niadtong petsa 10 sa Pebrero alas-10:00 sa gabii ug ang ikaduhang biktima napatay niadtong Pebrero 25 alas-7:00 sa gabii diin matud pa iyang gituok-patay ang mga biktima tumong nga makuha ang mga cell phone gumikan matud pa sa kalisud sa kinabuhi.
Gani nabaligya niya ang duha ang cell phone sa kantidad nga P13,000.
Sa report sa Talomo PNP, nakita ang suspek nga adunay sakay nga pasahero paingon sa awa-ay nga bahin sa Brgy. Langub ug nigawas nga wala nay sakay rason gikunsidera kini nga suspek.
Human sa panghitabo normal lang nga nagabyahe ang suspek apan human makonsensiya sa gibuhat mi-ampo kini sa kapitan sa maong barangay ug gi-endorso sa kapulisan.
Sa pinaka ulahing update, wala pa kahatag ang Regional Crime Laboratory Office (RCLO) og autopsy report bahin sa rason sa kamatayon ug kung gipanamastamasan ba ang mga biktima.
RadyoMaN Jason Amisola, RadyoMaN Paul Canono
