Polomolok, South Cotabato–Dead on the spot ang mag-amahan human nabanggaan ang gisakyang motorsiklo sa usa ka kotse sa National Hi-Way Brgy.Crossing Palkan, Polomolok alas 12:30 ang takna sa udto.
Giila sa kapulisan ang mag-amahan nga silang Nestor Masaglang, 48 anyos, ug si Carlo Masaglang, 23 anyos, nga maoy nagmaneho sa motorsiklo nga susamang nanimuyo sa nasampit nga Barangay , samtang ang driver sa kotse naila sa pangalang John Paul Bayron, 28 anyos, nga taga Barangay, Lagao, Gensan.
Sumala ni Nanay Beth Masaglang, asawa ni Nestor ug inahan ni Carlo nga gikan ang mag-amahan sa Polomolok aron mamalit ug mga gamit sa panimalay apan wala niini damha nga mao na kadto ang mahitabo sa iyang bana ug anak nga susamang namatay on the spot.
Saysay pa sa maong ginang nga mag-unsa nalang matud pa siya hilabi nga siya usa ka PWD ug wala na siyay kauban sa panimalay, rason nga nanawagan kini sa driver nga nakabangga patay sa iyang bana ug anak nga tabangan siya nga sagubangon ang tanang galastuhon sa pagpalubong sa duruha.
Nasayran nga basi sa imbestigasyon sa Traffic Management Unit -Polomolok susamang gikan ang duha ka sakyanan sa sentro nga bahin sa lungsod ug padulong sa direksyon pa Koronadal City apan pag-abot sa lugar misignal paliko sa wala nga bahin ang mga biktima, apan nabanggaan sa kotse ang likod nga bahin sa motrosiklo nga miresulta sa pagkalagpot sa mag-amahan nga nakaangkon ug mga samad sa lawas ug ulo nga misangko sa kamatayon samtang nasunog pa ang gisakyang motorsiklo sa mga nasampit.
Sa kasamtangan anaa na sa kustudiya sa Polomolok PNP ang driver sa kotse, samtang ginahuwat pa sa Polomolok PNP ang desisyon sa pamilya sa biktima kung ila bang pasakaan ug kaso ang driver o makig-areglo nalang sa suspek. (RV)
