General Santos City–Pormal nang gipasakaan ug kasong frustrated murder ang mag-amahang sundalo nga silang Pacquito Corpuz, 61 anyos, retiradong sundalo ug Noel Corpuz, hamtong ang pang-edaron aktibong miyembro sa Phil.Army nga susamang nanimuyo sa Purok Mausawagon, Barangay Labangal, Gensan kansa maoy gitudlong responsableng mipusil sa mag-umagad nga silang Jessa Mae Bayno, 24 anyos, ug Rowena Saturgo, 50 anyos nga residente usab sa nasampit nga lugar.
Kini ang gikumpirma ni Police Major Ananias Vasquez, Hepe sa Police Station 2 human nahinabi sa Rmn Gensan News Team.
Sumala pa sa opisyal nga gipaabot na lamang nila nga mogawas ang warrant of Arrest sa duha ka suspek ayha nila kini sikopon.
Apan gipaklaro ni Police Major Ananiaz Vasquez nga gikatakdang mo-counter matud pa ang mag-amahan ngadto na sa korte sa kasong gipasaka batok kanila gumikan sumala pa inosente sila sa panghitabo.
Kahibaloan nga una nang gialigarang gipamusil sa mag-amahan ang mag-umagad niadtong Nobyembre 9 ning kasamtangang tuig sulod mismo sa ilang panimalay samtang hinanok kini sa pagkatulog nga miresulta sa pagkaangol sa duha.
Saysay usab ni Vasquez nga sa kasamtangan nagpabiling nagpaalim ang biktimang si Jessa Mae sa ospital nga anaa na sa maayong kondisyon samtang nakagawas na sa ospital ang biktimang si Rowena.(Reynald Timario)
(Photo is for illustration only)
