Ara na sa luwas nga kahimtangan ang mag-amay nga John Villaruz, 36 anyos kag bata sini nga si Cedric, 8 ka tuig sang Culasi, Ajuy matapos nakita na ang mga ini kasunod sang una nga report nga nadula sila sang magub-an ang ila pump boat sa tunga sang lawod sang Disyembre 30, 2017.
Suno kay Sr. Petty officer Alejandro Genegaban, sang Coast guard-iloilo, nagdungka sa sitio Lusong, Brgy. Tanag, Buenavista, Guimaras, alas 7:00 sang gab-i sang disyembre 30, 2017 ang guba nga pump boat sang mag-amay apang wala gilayon makakontak sa asawa si John sa Culasi, Ajuy bangud naubosan sang baterya ang iya cell phone.
Kapin 14 ka oras nga nag-pa-utaw-utaw sa lawod gamit ang improvised nga layag kag bugsay ang mag-amay bangud nautod ang propeler sang ila pump boat samtang nagapauli halin sa Talisay city, Negros Occidental pakadto sa Culasi, Ajuy, iloilo.
