Davao City- Mireklamo sa presinto dos sa San Pedro PNP ang usa ka ginang human nabiktima sa mga fixer sa Land Transportation Office 11 (LTO-XI) ang iyang bana ug nakuhaan og 3,500 ka pesos natigayon niadtong milabayng bulan sa nahisgutang buhatan.
Subay sa blotter sa kapulisan San Pedro, ang biktima naila sa pangalang Constacio Marquez, hingkod ang edad, nagpuyo sa Brgy. Ula Tugbok District ning dakbayan samtang ang suspetsado ginganlan nga si Renato Elisis, hingkod ang pangidaron, walay kompletong address
Saysay pa sa asawa sa biktima nga si Regina Marquez, gi-offeran ug gipasaligan sa suspect nga tabangan ang iyang bana nga siya na ang bahala nga mo-process sa iyang professional driver’s license hinungdan mihatag sa kantidad ang iyang bana.
Apan sa dihang ilang gisusi sa buhatan sa LTO-XI, nasuta nga peke ang maong lisensiya hinungdan kagahapon ang asawa igo nalang sa pagdangop presinto sa kapulisan aron paimbestigahan ug interesado nga mopasaka og kaso batok sa suspetsado.
RadyoMan Don Pulayao
