Davao City- Nag-abot sa kuwerpo sa kapulisan sa Sasa ang mag-asawa human
misangko sa pagbinugnuay ang ilang paghugoyhugoy sa ilimnong makahubog.
Nahitabo ang insidente didto mismo sa ilang balay sa may Doña Salud, Sasa
ning dakbayan alas-12:00 sa tungang kagabhion.
Nag-isig niyagyagay og reklamo ang magtiayon nga sila Stanley Patrick ug
Princes Diot sa Presinto 4.
Suma sa bana nga gibun-og siya sa iyang asawa busa mibalos usab kini
pinaagi sa pagsagpa ug pagsipa kang Princess kinsa usa ka nurse.
Sa wala pa nahitabo ang binugnuay, naglipay una ang duha sa ilimnong
makahubog.
Ug tanto sa ilang pag-inom nagkabikil matud pa ang duha ug mas miinit pa
ang lantugi sa magtiayon.
Giingong wala makaagwanta ang asawa ug iyang gidagmalan ang mister busa
wala sab nagpalupig ang bana ug iya usab gibaslan pinaagi sa pagsagpa ug
pagsipa.
Pareho wala gisaysay sa duha kung unsa ang ilang gikabiklan nga hisgutanan
nga misangko sa pagdamalay sa mag asawa.
RadyoMaN Joel Viray
