Mag-asawa nga naplatan, ginhold-up.

Ginkasubo sang mag-asawa ang ila sini nadangatan , matapos nga ginhold-up sang duha ka lalaki nga nakasakay sa wala plaka nga motorsiklo sang nagligad nga gab-i sa parti sang Purok 3, Barangay Crossing Rubber, Tupi, South Cotabato matapos magkupos ang karito sang ila sini motorsiklo sa tunga sang kadulom sa nasambit nga lugar.
Suno sa imbestigasyon sang Tupi PNP, samtang ginatulod ni Archie Suarez Mogino kag iya asawa ang ila sini motorsiklo matapos maplatan sa madulom nga dalan malapit sa Dole Stanfilco Office sa nasambit nga lugar para mangita kuntani sang vulcanizing shop, hinali na lang nga may nagpundo nga XRM nga motorsiklo sakay ang duha ka suspek.
Nanaog suno pa ang angkas kag ginpalapitan ang mag-asawa nga biktima dayon taya sang wala natumod nga armas-luthang kag nagdeklara nga hold-up.
Wala suno pa sang nahimo ang mag-asawa kundi ihatag ang ila sini cellphone kag kwarta nga nagakantidad sa P14, 000.00.
Samtang nakilala suno pa sang biktima paagi sa rogue gallery sang mga suspek nga sanday Tadoy Makategel kag Solaiman Tantong Paraluma, pero tubtub subong wala pa nadakpan.
Kaangot sini, ginkakas ni South Cotabato Provincial Director Senior Supt Joel Limson ang Deputy Chief of Police sang Tupi PNP bangud sa asud-asud nga kriminalidad sa nasambit nga banwa.

Facebook Comments