Davao City – Wala pa mailhi sa Buhangin PNP ang driver sa Mitsubishi Strada, color itom, kinsa nakaligis sa mag-inahan resulta sa ilang kamatayon nga nahitabo sa CP Garcia Highway Buhangin area alas 7:15 kagabii.
Mipaturatoy og padagan ang driver sa Strada human mabanggai ang mag-inahan nga sila Shinkichie Ocada, 15 anyos, estudyante, ug Lorie Ocada, 43 anyos, pulos nagpuyo sa Diversion Road ning siyudad.
Mitabok ang mga biktima agi sa pedestrian lane apan pag-abot sa tunga kalit na lamang sila nadasmagan sa naghaguros nga Strada nga paingon sa dalang Maa.
Nalagpot sa pikas lane paingon sa Buhangin ang mga biktima ug mao usab pag-agi sa pick-up nga Navarra.
Sumala sa imbestigador nga si PO3 Antonio Petelona, nalatayan sa mga ligid sa pick-up ang mga biktima.
Gideklarang patay si Shinkichie sa Central 911 Medic Team samtang gidala sa Davao Medical School Foundation (DMSF) Hospital si Lorie apan nakabsan ra usab kini sa kinabuhi human sa pila ka minuto nga pagtambal kaniya.
Gikustodiya na karon sa Buhangin PNP ang driver sa pick-up nga si Llyod King ug naglusad na usab og operasyon ang kapulisan batok sa driver sa Strada.
RadyoMaN Joel Viray
