Davao City – Ginasuta pa karon sa kapulisan ang pagpusil-patay sa mag live-in sa Km. 71, Brgy. Sinawilan, Matanao, Davao del Sur bandang alas 11:15 sa buntag kagahapong adlawa, September 10, 2018.
Sa report gikan sa Davao Sur Police Provincial Office, giila ang mga biktima nga sila Gerry Blatang Diagan, 35 anyos ug usa ka CSU sa Provincial Capitol Digos City ug residente sa Santolan, Brgy. Tres de Mayo, Digos samtang ang live-in niini naila nga si Flor Jifel Flores, 30 anyos ug residente sa Brgy. Eman, Bansalan, Davao del Sur.
Sa inisyal nga imbestigasyon nga gilusad sa kapulisan, nagsakay matud pa ang duha og single nga motorsiklo gikan sa Digos padulong sa Bansalan apan pag abot sa nasangpit nga incident area, gipusil sa duha ka mga wala pa mailhing mamumuno ang mga biktima igo sa ilang mga ulo.
Daling gidala sa ospital ang mag live-in apan gideklara na kining dead on arrival.
Human sa insidente, misibat gilayon ang mga suspek ug alegasyong gitangang ang bag pack ug sling bag sa babaeng biktima.
Narekober sa maong panghitabo ang .45 calibre pistol, mga bala nga gigamit sa mga suspetsado sa pagpamusil lakip ang mga gamit sa mga biktima.
Sa karon, nagpadayon ang imbestigasyon kalabotan sa maong insidente samtang ang patayng lawas sa mga biktima gipangdala na sa punerarya.
RadyoMaN Renz Barbarona
