Davao City – Nagpatabang sa kapolisan San Pedro PNP ang usa ka 22 anyos nga lalaki human giharas lakip ang iyang live- in partner alas-6:10 sa kagabhion natigayon didto sa Bolton Ext. Barangay 40-D siyudad sa Davao.
Basi sa blotter sa Sta Ana Pnp ang biktima naila sa pangalang Phillip Facifeco, 22 anyos residente sa nasangpit nga lugar samtang ang suspek mao si Dan Necesario, 28 anyos nga nagpuyo usab sa nasangpit nga barangay.
Matud pa samtang ang biktima pauli sa iyang balay kalit niyang nakit-an nga gihulga ni Necesario ang iyang live-in partner ug gikapakaulawan.
Gawas niini, gisulayan sab og sumbag sa suspek ang kapuyo-puyo ni Facifeco apan siya naman hinuon ang naigo sa kamao ni Necesario.
Human niini, mikuha ang supek og kutsilyo aron dunggabon unta ang mga biktima apan maayo na lang napugngan kini sa igsuon sa suspek.
Way nahimo ang biktima gawas lamang sa pagpablotter aron usab niya paimbestigahan ang maong insidente.
RadyoMaN Don Pulayao
