Molave, Zamboanga del Sur – Pusas ang purselas karon sa 42-anyos nga mag-uuma nga maoy gitudlong responsable sa pag-luba sa 51-anyos nga biktima sa Purok 2, Barangay Alicia, sakop sa lungsod sa Molave probinsya sa Zamboanga del Sur.
Gapa-alim karon sa samad nilubaan sa balay tambalanan sa syudad sa Ozamis ang biktima nga si ROGELIO SALVEJO a.k.a. ”LOLOY”, 51-anyos nga lumulupyo ra usab sa nasangpit nga lugar.
Malampuson usab nga nadakpan sa kapulisan ang suspek sa pagpanluba nga si PATRICIO ANTIGA VILLAGANAS a.k.a. ”DONSOY”, ug na-imbargo sa iyang posisyon ang usa ka sandang nga maoy gigamit sa pagduslak sa biktima.
Nasuta usab sa mga niresponde nga pulis nga langgo sa ilimnon nga makahubog ang suspek.
Sa inisyal nga imbestigasyon nasayran nga samtang nahigda lang sa sala sa ilang pinuy-anan nga balay ang biktima kalit kining giluba sa suspek.
Personal nga bangi ang motibo nga gisundan karon sa kapulisan ilabina nga nasayrang kauban ra sa pinuy-anan ang suspek ug biktima kay suod raman kini nga paryente.
