Mahayag, Zamboanga del Sur – Samaran ang usa ka mag uuma human kining gipusil kaniadtong lunes sa gabie didto sa Purok 1, Barangay Tulan, Mahayag, Zamboanga del Sur.
Ang biktima nailang si RICHARD LASO ETOL, 38 anyos, ulitawo ug residente sa Purok 1, Barangay Tulan, Mahayag, kinsa gipusil sa suspetsado nga naila sa pangalang si JEBERT HINALAS MONTEZA, hingkod ang panuigon ug residente sa Brgy. Malubo, Mahayag.
Saysay pa ni Angelito Casiong,ang kapitan sa barangay Tulan kinsa mao ang mitaho sa buhatan sa kapulisan kagahapon sa udto, naglingkod lamang sa bangko sa gawas sa ilang balay ang biktima dihang miabot kining suspetsadong si Monteza ug gidul-itan ug pusil si Etol gamit ang wala pa nasayring kalibre sa armas.
Nakaangkon ang biktima ug igo sa iyang wala nga bukton ug dalunggan samtang ang suspetsado daling misibat paingon sa Barangay New Tangub, Sergio Osmeña, Zamboanga del Norte.
Human sa pagpamusil, mikabat pa sa lima ka oras pa ayha nadala paingon sa tambalan ang napusilan nga biktima gumikan sa ka distansya sa maong barangay ug sa kamaot sa panahon lakip na ang kakusog sa bul-og sa suba hinungdan nga maglisod ug tabok ang mga mirescue sa biktima.
Hinoon, anaa na stable nga condition ang biktima nga kasamtangang nagpaalim sa Mahayag Municipal Hospital.
Padayun pa usab nga gisuta sa kapulisan ang motibo sa naasoyng pagpamusil.
