Nagalab-ot sa P20 million ang natuga nga danyos sang ginsunog nga tatlo ka mga heavy equipment sang mga ginaaligar miyembro sang New People Army ukon NPA sa boundary sang Sitio Dhalia, Brgy. Edwards, T`boli kag Purok Pag-asa, Brgy Veterans, Surallah, South Cotabato, pasado alas 3 sang hapon sang Hunyo 15, 2020.
Base sa imbestigasyon sang T`boli Pnp ang tatlo ka mga heavy equipment nga ginpangsunog ang ginalakipan sang 1 ka unit sang Ten wheeler Isuzu Dump Truck, 1 ka unit sang Wheel Loader kag isa ka Backhoe nga ginapanag-iyahan sang Gemma Construction.
Nagapatigayon suno pa sang operasyon ang mga heavy equipment sa Sinfed Quarry Site, Allah River sa Purok Pag-asa, Brgy. Veterans, Surallah, South Cotabato sang nagluntad ang insidente.
Nagagwa man sa imbestigasyon nga apat ka mga wala nakilal-an nga mga kalalakihan nga may dala nga short firearms ang nag-abot sa lugar kag gilayon nga ginsunog ang nasambit nga mga ekwipo.
Samtang magluwas sa tatlo may-yara suno pa ang mga ini sang back-up nga dose ka mga fully armed men nga ginapatihan miyembro sang GF 72 Musa FSMR.
Gilayon naman nga nagpalagyo ang mga suspek padulong sa direksyon sang Sitio Daisy, Brgy. Upper Maculan, Lake Sebu, South Cotabato.
Nagrespondir man gilayon ang tropa sang T`boli PNP, 2nd Company sang SCPMFC kag SF, PA para sa pagpatigayon sang imbestigasyon kag pursuit operation sa posible pag-aresto sa mga suspek.
photo credit to: T`boli MPS
